محمد شهابي

قال الحاجب حارس لخيال
درتي لفتنة يا داك الدجال
مالك انت أوو مال الرجال
أهل الصدق في القول و لفعال

يا هلي قال سيدي سيد الرجال
لقلوب الصافية ما يغيرها حال
لقدام الثابتة ما تعرف تبدال
هذا حال من جالس الجبال

مانا مسخوط و لا نفسي سريفة
و لا قصدي مغلوط ولا عيني كفيفة
ما نبغيك تكون مربوط مضروبة ليك التكتيفة
كلامي ليك مضبوط و نصيحتي ليك حصيفة

خليك مني و من رسمي و شكون أنا
راني ندوي بلا ما نسمي نبغي نبه عقول حيرانة
اسمع لكلامي و لهمي و نصيحتي ليك أمانة
واياك تعْمى و تعَمِّي و تقول الحالة مزيانة

يا هلي را ماهياش قصارة ولا زعامة و ضسارة
تقول الشيطان غواني و طاوعاتو الأمَّارة
و أنا همك كواني ما نفعات معاه شطارة
و انت أمرك حيرني ونخاف عليك من لخسارة

يا لي لبستي توب العصمة و رميتيني بتهمة ثقيلة
وقلتي لسانك لسان الحكمة و وصفتي كلمتي بلعليلة
آش ينفع زيتك في الضلمة و قنديلك بلا فتيلة
منين تجيب قلب الرحمة يا لغافل قليل الحيلة

راه لي تبلى بالناس و تقدم للزعامة
و لبس سلهام الصالحين و العولما
يسمع حتى لعوام وما يقول فيهم لفهامة
يجاوب جواب العاقلين و الحكماء

لِّي نيتو صافية و عقلو ثقيل و رزين
يسال ربي الصدق والرفق و اليقين
يطلب الستر والنجا ومولانا يكون ليه عوين
يصبر على لكلام القاصح خير ليه من كلام الكاذبين

يا ربي ستر الحالة و صحح النية و عطينا أجر الصابرين
واجعل حاجتي مقضية و و جميع لحباب السامعين
اجمعنا بمول لوصية و النور واكتبنا في صحابو الصادقين
و الصلاة عليك دايمة مهدية يا سيد الأنبياء و المرسلين